1. Januar

   A KL Januarius habet dies triginta und lunae xxx.

   Circumcisio domini nostri Ihesu Cristi.

[S]ancti Almachij martyris. Der wart enthoubet darůmme, daz he sprach:

   „Ez ist hůte der achte tag gotes, daz he geborn wart. Horet uf von deme

   bewollen opfere der abgote.“

   Sancte Martine virginis und martyris. Der [=die] was von hochem

   geslechte unde vil riche. Unde daz gab sie al den armin durch got. Sie

   wart uf gehaldin von deme keysere Alexandro und gebotin, daz sie

   opfiren scholte dem abgote Apollini. Do sprach sie ir gebet zů gote und

   alzů hant wart die ertbiebunge also groz, daz die stat zů Rome zů schut

   wart und ein teil der hůser zů storet und der abgot zů brochen und vil

   der lůte dar ab gestorben. Do erzurnte sich der keyser und gebot, daz

   man der heiligin maget antlitz zů slůge mit orslegin und ire wimbra

   alzů breche. Und daz tatin acht man. Und die selbin, die daz tatin, die

   riefin und sprechin, sie segen vier schone man, die die maget sterktin.

   Und dar ab wurdin sie bekart. Do liez he sie selbin ouch hengin und mit

   swertin zů riten. Und dar nach slug man in die houbet ab. Da miete

   quamin sie zů gote. Do wart die maget aber zů der martyre bracht und na

   vil pinen zů