se, als ob da lampin inne brentin. Do kůndigitin die rittire diz alliz deme richtere. Und he

   liez in brengin vor sich und mit knůttilin slan. Und also brachte man

   die hertiste gerte und strebinde. Die begondin alzů hant zů weichinde

   an irin handin. Do daz Claudius sach, do gebot he, daz man in cleidin

   solde und viel im zů vůze mit alle sinin rittirin und bat, daz he sie

   toufte. Also wart he getouft und sin husvrouwe Hylaria und sine zwene

   sůne und sine vrůnt und al sin ingesinde und siebinz[i]g rittire mit al

   irin knappin. Do daz der keysir vornam, do liez he Crisantum und Darian

   in deme kerkere besliezin, da bose rouch uz gieng. Darna war Daria in

   daz unreine hus bracht, da sie gemeine solde wesin. Crisanto quam daz

   gotliche liecht und edil ruch. Und Darie quam ein lewe zů helfe von

   sime gate. Und alle, die woldin zů ir gen, also sie den lewin sagin bi

   ir, so gabin sie die vlucht. Also liez der richter daz hus bůrnin und

   den lewin mit ir. Do der lewe daz fůr sach, do begonde he zů vechtinde

   und zů rufinde. Do sprach sie zů im: „Geng ůz sicherliche! Und den dů

   an mir geerit hast, der in [=en] schal des nicht gestatin, daz dir ich

   gesche.“ Darna wurdin sie abir gehangin und mit lampin zů den siten

   gebrant. Also wart daz holtz zů nichte und die bant zů brachin und die

   lampin vor laschin. Zů lest liez he sie lebinding mit steinin und mit

   erdin begrabin. Also quamin sie zů gote. Und do manich zeichin dicke

   durch ire werdicheit geschach an irme tage zů einim male, do quam

   unzellich volk zů der kyrchin. Und al die wile, daz sie got lobitin und

   messe sungin und daz volk al gotis licham entpfieng, do liez der keiser

   di want uf nemin. Also wurdin sie alle gemartiret durch got.