herzicheit has bewiset an den kindin, so si wie die gesant

   von gote, daz wie die ratin, wie dů gesunt werdis. Nů hore unse manunge

   und tů nach unsime rate: Sente Silvester, des ist an dem berge, wand he

   vloch din gebot. Den laz holin zů die und der schal die wiesin ein

   wazzir, als dů dries wirdis dar in gestozin. Zů deme drittin male

   wirdis dů gesunt, so schaltů dime losere Jesu Christo dankin da miete,

   daz dů ůbir al die stat zů Rome die kyrchin wiedir machis. Und dů

   schalt dich reinigin von den abgotin und einin got an betin, Jesum

   Christum.“ Do sante he alzůhant na sancto Silvestro und saite im alliz,

   waz im got bewiset hatte. Do dankte he gote und toufte in. Und do he uz

   von der toufe steig, do wart he gesunt. Und an deme erstin tage sinir

   toufe gab he die e, daz alle die stat zů Rome diesin got anbetin solde,

   der in gesunt gemachit hette. An deme andirin tage gebot he, daz alle

   die deme gote chein lastir bůtin, die solde man pinigin. An deme

   drittin tage, swer den kyrstin lastir bůte, daz man deme daz halbe teil

   sinis gůtis nemin solde. An deme vierdin tage, daz der pabist houbit

   wesin solde und alle bischove und priestire in zů richtere habin

   soldin. An deme vunftin tage, daz alle kyrchin daz recht habin, von

   deme tage, daz sie gewiet sin, swelch mensche darin vlie, daz im sine

   viende nicht enschadin enturrin. An deme sechtin tage, daz nieman eine

   kyrche buwin sal sundir sines bischovis urlob. An deme siebindin tage

   gab he den zendin alle sinis kůnigrichis, daz man gotis hus miete

   bezzirte. An deme achtin tage, do he die wizin cleidir uz tet, do quam

   he zů sancto Petro gesunt mit grozir růwe, daz he also manigin

   gemartiret hatte und clagite gote alle sine missetat und lebite dar na

   an manigin gůtin wer